P3M na nalikom sa kaarawan ni Angara ibibigay sa PGH foundation
MANILA, Philippines — Mahigit P3 milyon ang ibibigay ni Senador Sonny Angara sa Philippine General Hospital (PGH) Medical Foundation na siyang perang nalikom sa kanyang ika-50 kaarawan.
Sa isang Facebook post, nagpasalamat ang senador sa dumalo at nag-organisa ng kanyang party na siyang kinabibilangan nina Pangulong Ferdinand "Bongbong" Marcos Jr., First Lady Liza Marcos at Speaker Martin Romualdez.
"Big thanks to: my family for throwing me a 50th bday party with musical numbers from family and friends; thank you to my fellow senators led by SP Senator Migz Zubiri for their impromptu song number, with an epic surprise participation by a very game PBBM, [F]irst Lady Liza Marcos, Speaker Romualdez and a very nice song from the Senate spouses," saad niya sa paskil, Linggo.
"[B]est part of the night is that we raised over PhP 3 million for the PGH Foundation- our chosen beneficiary in lieu of gifts," pagpapatuloy niya.
Kaugnay nito, sinabi rin ng opisyal na dumalo sa kanyang birthday party si PGH director Dr. Gerardo Legaspi.
"I am sure the fantastic emceeing by Congs Rachel ‘Cutie’ Del Mar and Miro Quimbo and the presence of UP-Philippine General Hospital PGH Director Dr. Legaspi helped loosen the purse strings," aniya,
"God bless all of you for giving generously, madami po kayong matutulungang mahihirap na pasyente."
Nito lamang Sabado ng gabi ikinasa ang naturang okasyon sa Manila Polo Club.
'Party for a good cause'
Sa isang video na ibinahagi ni Cavite Representative Lani Mercado-Revilla, makikita ang kanyang mister na si Senador Ramon "Bong" Revilla Jr na kumakanta ng “You’ve Lost That Lovin’ Feelin’” kasama si Marcos at ibang senador tulad nina Raffy Tulfo, JV Ejercito at Win Gatchalian.
"Tao lang naman kami, marunong din dapat kaming mag-relax 'di ba," ani Tulfo sa isang panayam nang tanungin tungkol sa mga kritisismo ng publiko na sinasabing nagkakasiyahan lang ang mga nasa pamahalaan habang kinakaharap ng bansa ang problema ng inflation.
"[P]angalawa, it was for a cause din from what I've heard nakapag-ipon ng 3 million pesos [a]t ibibigay 'yon sa PGH. So may naitulong 'yung party na 'yon hindi lang pagsasayaw-sayaw kundi for a good cause," giit pa niya. — Philstar.com intern Vivienne Audrey Angeles, may ulat mula GMA News
- Latest
