MANILA, Philippines — Nilinaw kahapon ng Malacañang na hindi special non-working holiday ang Agosto 9, araw ng libing ni dating Pangulong Fidel Ramos.
Ginawa ni Press Secretary Trixie Cruz-Angeles ang paglilinaw matapos may lumabas na ulat sa social media na nagsasabing idineklara ni Pangulong Ferdinand Marcos Jr. na holiday ang Agosto 9.
Ayon kay Angeles, dapat hindi paniwalaan ang kumakalat na mga post sa Facebook
“Huwag po tayo maniwala sa mga kumakalat na post sa Facebook at sa iba pang social media platform na idinedeklarang special non-working holiday ang August 9, 2022. Hindi po ito totoo at walang inilalabas na anunsyo o proklamasyon tungkol dito,” ani Angeles.
Pinayuhan din ni Angeles ang publiko na maging mapanuri sa mga nababasa sa social media.
Sa Agosto 9 ililibing sa Libingan ng mga Bayani si Ramos kung saan gagawaran siya ng state funeral at full military honors.