MANILA, Philippines — Inamin ni Senator Manny Pacquiao noong Biyernes na namigay siya ng pera sa isang pagtitipon sa Batangas pero itinanggi na isa itong uri ng vote buying.
Bukod sa pera, namigay din si Pacquiao ng grocery at bigas.
“Yes, totoo po ‘yan namigay tayo ng tulong, grocery, bigas, at pera na tag-iisang libo,” ani Pacquiao sa panayam noong Biyernes.
Pero itinanggi niya na namili siya ng boto dahil matagal na aniya siyang tumutulong sa mga nangangailangan.
“Hindi [ito vote-buying] kasi ‘yung pamimigay ng pera at bigas, 2002 ko pa ginagawa ‘yan…Mula noon hanggang ngayon, may eleksyon man o walang eleksyon, habit ko na mamigay ‘pag nakita ko may nangangailangan, nagugutom,” sabi ni Pacquiao na tumatakbong pangulo ng bansa.
Ikinatuwiran pa ni Pacquiao na hindi pondo mula sa gobyerno ang perang ipinamigay niya.
“Ito parang pilosopo. Ano gusto niyo mamigay ako ng pera o magnakaw ako?” ani Pacquiao.
Nagpunta si Pacquiao sa Balayan, Batangas noong Huwebes at namahagi ng relief packs sa may 7,000 biktima ng pagsabog ng bulkang Taal.