MANILA, Philippines — Inanunsiyo ni Senator Leila de Lima na muli itong tatakbo sa Senado sa 2022 elections.
“Tatakbo akong muli. Hindi ako susuko. Tuloy ang laban,” lahad ni De Lima.
Sinabi ni De Lima na pinatingkad ng kanyang pagkakakulong na magsumikap at magtrabaho nang mahusay upang labanan ang kawalan ng katarungan at ipagtanggol ang karapatang pantao anuman ang mangyari, kaya siya muling tatakbo bilang senador.
Ang naging kasalanan umano niya ay ang pagsalita laban sa extra judicial killings (EJK) kaya siya pinatawan ng mga gawa-gawang kaso hinggil sa droga, pero ang mga tao na may kinalaman sa droga ay nananatiling nakakalaya.
Kahit na nakakulong ng halos limang taon ay nakapagsampa si De Lima ng 500 panukalang batas at mga resolusyon, at nakakapag-akda at naisabatas ang Pantawid Pamilyang Pilipino Program (4Ps) Act, Magna Carta of the Poor Act, Community-Based Monitoring System Act, and the National Commission for Senior Citizens Act.