MANILA, Philippines — Nadakip na ng pulisya sa Camarines Norte si Batuan, Masbate Vice Mayor Nelson Refermoso Cambaya na isa sa pitong suspek sa pagpatay kay Vice Mayor Charlie Yuson III noong 2019.
Ayon sa pulisya, si Cambaya, 58, ay naaresto sa isang barangay sa Quinapagian, Mercedes, Camarines Norte, kamakalawa ng hapon.
Natunton si Cambaya dahil sa pagkikipagtulungan ng Barangay Intelligence Network (BIN).
Hindi na nakapalag si Cambaya nang isilbi sa kanya ng mga pulis ang warrant of arrest dahil sa kasong murder at frustrated murder.
Magugunita na Oktubre 9, 2019 nang pagbabarilin hanggang sa mapatay si Yuson ng mga armadong lalaking lulan ng kulay gray na van. Sugatan sa pamamaril ang dalawang kasama niyang nag-aalmusal sa tapat ng isang bahay sa Vicente Cruz Street, Sampaloc, Maynila.
Bukod kay Cambaya, nakapiit na sa Mercedes Municipal Police Station, ang akusado rin sa pagpatay kay Yuson na si PCSO board member Sandra Cam, anak niyang si Marco Martin Cam, Junel Gomez, Bradford Solis, Juanito de Luna at Rigor dela Cruz.