500K doses ng AstraZeneca ibubuhos sa NCR

MANILA, Philippines — Nasa 500,000 doses mula sa 2 milyong natanggap na delivery ng AstraZeneca vaccines ang nakalaang ibigay sa Metro Manila na sentro ng pandemya sa bansa.

Sinabi ni Health Undersecretary Maria Rosario Vergeire na pinakamalaki ang bilang na mapupunta sa NCR na susundan naman ng mga katabing lalawigan sa Central Luzon at Calabarzon regions.

Gayunman, hindi na idinetalye kung ilan ang alokasyon sa iba pang rehiyon na nakahanda nang ipadala simula kahapon.

Ang bagong donasyon ng AstraZeneca ay nagmula sa COVAX facility.

Nabatid na maaari nang muling gamitin sa pagbabakuna laban sa COVID-19 ang AstraZeneca na pansamantalang ipinatigil para sa may edad na mas mababa sa 60, kasunod ng mga napaulat na adverse effects tulad ng blood clotting matapos turukan, bagama’t sa Pilipinas ay walang insidente tulad nito.