COVID-19 tests sa mga biyahero sa 7th, 8th day ng quarantine, giit ng IATF
MANILA, Philippines — Irerekomenda ng Department of Health (DOH) sa IATF (Inter-Agency Task Force against COVID-19) na magsagawa ng COVID-19 testing sa mga biyahero sa ika-7 o ika-8 araw ng kanilang quarantine makaraang lumapag ng Pilipinas.
Ipinaliwanag ni Health Undersecretary Maria Rosario Vergeire na natagpuan nila na mataas pa rin ang ‘viral load’ sa ika-7 at ika-8 araw kaya nais nilang rebisahin ang protocol para sa mga biyahero.
Sa kasalukuyan, isinasailalim sa COVID testing ang mga dayuhan at Pilipinong nagbabalik sa bansa sa ikalima at ikaanim na araw ng kanilang isolation.
Kaugnay nito, sinabi ni Vergeire na hindi pa rin nila ipinatutupad ang testing sa mga Pilipino na lalabas naman ng bansa. Magiging depende umano ito sa ahensya o kaya sa destinasyong bansa kung polisiya nila ito.
Matatandaan na isang Pinoy domestic worker ang nagpositibo sa COVID-19 pagdating sa Hong Kong noong Abril 21. Maaa-ring nakuha umano ito ng pasyente habang nasa biyahe o kaya naman ay habang nasa quarantine siya.
- Latest
