MANILA, Philippines — Nanawagan kay Davao City Mayor Sara Duterte ang grupong Alyansa ni Inday Sara na irekonsidera ang pagtakbo bilang Pangulo ng bansa sa May 2022 elections.
Ayon kay Dr. Alvin Sahagun, pangulo ng Alyansa ni Inday Sara, muli silang nagsama-sama sa araw ng pagdiriwang ng Edsa Day kahapon para ipanawagan sa Alkalde na baguhin ang desisyon at tumakbo sa susunod na halalan.
Ito’y matapos ihayag ni Mayor Sara na wala siyang planong kumandidatong Pangulo.
Naniniwala ang grupo ni Sahagun, na kaya ni Mayor Sara na pangasiwaan ang bansa sa tulong na rin ng mamamayan na naniniwala ng pagbabago sa ilalim ng pamunuan nito.
Ang pagka-number 1 anya ni Mayor Sara sa latest OCTA research survey sa hanay ng mga presidentiables ang isa ring nagbigay daan sa kanila para kumbinsihin ang Alkalde na tumakbong pangulo sa Mayo 2022.
Nilinaw naman ni Sahagun na walang mala-laking tao o grupo na nag-uudyok sa kanila para suportahan si Mayor Sara kundi ito ay kanilang boluntaryong pagkilos at sarili nilang gastos.