Duterte handang unang magpabakuna
MANILA, Philippines — Handa umano si Pangulong Rodrigo Duterte na maunang magpabakuna kontra COVID-19 para maalis ang takot at pangamba ng publiko rito.
Sinabi ito ni Presidential spokesman Harry Roque bilang tugon sa pahayag ni Vice Pres. Leni Robredo na si Duterte ang dapat maunang maturukan para mabalik ang tiwala ng publiko sa bakuna.
Ang reaksyon ni Robredo ay kasunod ng sinabi ni Duterte sa kanyang public address noong nakaraang linggo na siya ang pinakahuling magpapabakuna dahil dapat mauna ang mga medical frontliners at vulnerable sectors.
Ayon kay Roque, kung sa tingin umano ng Presidente na natatakot ang mga tao sa bakuna ay hindi naman siya mag-aatubili na maunang magpaturok nito.
“Basta ang sa kaniya, interes ng taumbayan bago ang interes ng mga nakaupo,” paliwanag pa ni Roque sa desisyon ni Duterte na mahuli sa bakuna.
Taliwas naman ito sa naunang pahayag ni Duterte na siya ang unang magpapabakuna sa sandaling dumating na sa bansa ang bakuna kontra COVID-19.
Inaasahan na darating na sa Pilipinas ang unang supply ng COVID vaccine sa Pebrero.
- Latest