MANILA, Philippines — Muling pinabubuhay ni Pangulong Rodrigo Duterte ang mga anomalyang bumalot sa nakaraang mga administrasyon.
Kabilang sa tinukoy ng Pangulo ay ang proyektong palikuran sa Philippine National Railways (PNR) kung saan magkakatabi ang inidoro at walang dividers na pawang mga proyekto sa ilalim ng administrasyon ni dating pangulong Noynoy Aquino.
Sa pre-recorded public address ng Pangulo, pinababalikan niya ang mga maanomalyang proyekto at kwestyunableng programa ng gobyerno.
Kabilang din sa binanggit ng Pangulo ang mga anomalya sa road right of way.
Dahil dito kaya binalaan ni Duterte ang mga opisyal na nasangkot sa mga nagdaang korapsyon na hahabulin pa rin sila ng administrasyon at iimbestigahan ito.
Nagbabala din ang Presidente na gugugulin niya ang nalalabi niyang dalawang taon sa pwesto sa paghahabol sa mga korap sa gobyerno at sa pagsasampa ng kaso laban sa kanila.