UV disinfection lights nakaka-cancer - DOH
MANILA, Philippines — Nagbabala ang Department of Health sa publiko laban sa sobrang paggamit ng UV disinfection light bilang pangontra sa COVID-19 dahil posibleng magdulot ito ng cancer.
Sinabi ni Health Undersecretary Maria Rosario Vergerie na may mga lumabas na pag-aaral na nagsasabing ang labis na exposure sa UV light ay nakakasama sa kalusugan.
Ayon pa kay Vergerie, bukod sa posibleng magdulot ng cancer, maaari ring mamula ang balat at maapektuhan ang mata kung tatagal sa 60 minuto ang exposure sa UV light.
“And mayroon pong mga lumalabas, mga lumabas na mga studies na halimbawa, na-expose po kayo kahit 60 minutes or mayroon ding sinabi ng isang study for hours, nakikita po na nagkakaroon ng pamumula ng balat, maaaring maapektuhan ang mata and of course prolonged exposure to this can be harmful also, because it is carcinogenic. Ibig sabihin, it might cause cancer also,” ani Vergerie.
Sinabi ni Vergeire na dapat lamang mag-ingat ang mga gumagamit ng UV light at ikonsidera ang sinasabi ng mga eksperto.
Ipinunto rin ni Vergeire na wala pang sapat na ebidensiya na nagsasabi na ang UV light ay maaring pumatay ng SARS COVID 2 virus.
Bagaman at matagal na aniyang ginagamit ang UV light bilang isang procedure sa disinfection sa mga health facilities pero mga trained o bihasa na ang mga gumagamit nito.
- Latest