President Duterte bumanat kay Vice President Robredo

MANILA, Philippines — Muling binuweltahan ni Pangulong Rodrigo Duterte si Vice President Leni Robredo na diumano’y nakukulangan sa ginagawa ng gobyerno para tugunan ang problema ng COVID-19.

Tinanong ng Pangulo kung ano pa ang kulang gayong may mga ospital, kama at punerarya naman.

Sinabi ng Pangulo na nasa hangin lamang ang virus kaya kailangang magsuot ng face mask at face shield.

Muli ring ikinumpara ng Pangulo ang Pilipinas sa isang lumulutang na barko na walang magawa hangga’t walang vaccine.

Binanggit din ng Pa-ngulo na huwag maniwala sa mga dilawan pati na kay Robredo na “kung anu-anong pinagsasabi” sa gobyerno.

“‘Wag ho kayong maniwala diyan. Sus, itong mga dilawan. Lalo na, I hate to mention her name, itong si Leni kung anu-ano ang pinagsasabi,” ani Duterte.

Kung gusto anya ni Robredo ay ispreyan na lang ng pesticide ang Pilipinas o Maynila galing sa eroplano para mamatay lahat.

Sinabi rin ni Duterte na hindi dapat pinapalaki ang problema ngayong may pandemic at dapat iwasan ang mga “reckless statements” na hindi sapat ang ginagawa ng gobyerno.