MECQ, isagad ng 1 buwan - Leachon
Para ma-flatten ang curve
MANILA, Philippines — Iminungkahi ng dating task force on COVID-19 adviser na magpatupad na ng “one time-big time lockdown” para mapababa ang bilang ng tinatamaan ng virus.
“Kung talagang MECQ ang gusto nila, isagad nila ng isang buwan tapos i-build up na ‘yung health care capacity. Magpa-flatten tayo ng curve,” ani Dr. Tony Leachon.
Aniya, dapat ay walang ‘gap’ kaya kung sasagarin na ang lockdown ay pagkakataon na ito para ihanda ang publiko sa inaasahang pagdating sa Disyembre ng COVID-19 vaccine na may time frame na 3 buwan.
“Ngayon pa lang tayo umaarangkada sa health care capacity so one time, big time, and then dadating ang bakuna ng Disyembre, tamang-tama kasi ang mga countries sa mundo 3 buwan nilang na-flatten ang curve, ‘yun ang timeframe,” paliwanag niya.
Naniniwala si Leachon na may local transmission dahil sa kabila ng pagtaas ng testing rate, nasa 11.9 porsyento ang nagpopositibo.
Inihalimbawa niya ang Cebu, na dating may 33 porsyentong positivity noong Hunyo, nang isailalim sa ECQ ay bumaba sa 7 porsyento.
- Latest