MANILA, Philippines — Nakikipag-ugnayan na ang Department of Foreign Affairs (DFA) sa iba’t ibang international partners nito para masiguro na makakakuha ng bakuna laban sa COVID-19.
Sa pahayag ng DFA, sa pamamagitan ng kanilang Foreign Service posts, ay sinimulan na nila ang koordinasyon at palitan ng impormasyon sa ibang bansa tulad ng America, Asia at Pacific, Europe, Africa at Middle East kaugnay sa development sa bakuna laban sa nasabing virus.
Ang mga impormasyon umano tungkol sa developments at potential international partners ay inindorso na sa Department of Science and Technology (DOST) bilang chairman ng Sub-Technical Working Group on COVID-19 vaccine clinical trials.
Nagpahayag naman ng kahandaan ang DFA na suportahan ang effort ng Philippine government agencies sa pagtugon sa pandemya sa pamamagitan ng pag-secure sa bakuna para sa mga Filipino sa lalong madaling panahon.
Ang Pilipinas ay isa sa may pinakamataas na bilang na kaso ng COVID-19 sa Southeast Asia na pumalo na sa mahigit 52,000 kung saan 1,314 dito ang nasawi.