Enrolment kasado na – DepEd

MANILA, Philippines — Kasado na ang enrolment bukas (Lunes) ng mga estudyante sa pampublikong paaralan sa bansa para sa school year 2020-2021.

Ayon kay DepEd Sec. Leonor Briones, inatasan na nila ang lahat ng school superintendent, supervisor, principal at mga guro sa lahat ng public school sa bansa para sa nasabing enrolment.

Sinabi ni Briones, magsisimula ang mga “virtual class” sa Agosto 24 at walang magaganap na face-to-face classes dahil sa banta ng COVID-19.

Sa ngayon aniya ay tuluy-tuloy ang pagsasagawa nila ng konsultasyon sa mga magulang at iba pang stakeholders hinggil dito.

Paliwanag pa niya, kailangan itong pag-aralan ng mabuti dahil sakaling ipatupad ay magtutuluy-tuloy na aniya ito sa mga susunod pang school year.

Pinaigting pa nila ang kanilang pagsusumikap na gawing available ang online classes sa mas maraming mag-aaral sa bansa, dahil malaki ang maitutulong nito sa kanila.

Matatandaang unang bahagi pa lamang ng Marso nang suspindihin ng pamahalaan ang mga klase sa lahat ng antas sa Metro Manila matapos na makumpirmang nagkakaroon na ng community transmission ng COVID-19 sa bansa.