14 sa 17 Metro Manila mayor pabor sa GCQ
MANILA, Philippines — Ibinunyag kahapon ni Metro Manila Council Chairman at Parañaque City Mayor Edwin Olivarez na karamihan sa mga alkalde ang nagnanais na mailagay na rin sa general community quarantine (GCQ) mula sa modified enhanced community quarantine (MECQ) ang Metro Manila mula sa Hunyo 1.
Sa 17 Metro Manila mayors, 14 aniya ang mas pinipili na maisailalim na ang kanilang lunsod sa GCQ sa pagtatapos (ng MECQ) sa Mayo 31 subalit mananatili pa rin ang mahigpit na pagpapatupad ng health at safety protocols.
Sumang-ayon aniya sa kaniya ang marami sa mga alkalde na may ‘devastating effect’ ang coronavirus disease 2019 (COVID-19) pandemic sa kabuhayan ng mga manggagawa at negosyante partikular sa Metro Manila. Sa Mayo 27 magpupulong ang MMC para sa mabubuong rekomendasyon kung ida-downgrade o hindi ang MECQ sa Metro Manila.
Matatandaang noong nakalipas na pulong noong Mayo 9, sina Quezon City Mayor Joy Belmonte, Makati Mayor Abby Binay; Manila Mayor Isko Moreno, Malabon Mayor Antolin Oreta III, Las Piñas Mayor Imelda Aguilar ay iniendorso na maisailalim na sila sa GCQ sa pagtatapos ng ECQ noong Mayo 16.
Kabilang pa sa mga nagsusulong na maibaba na sa GCQ ang MECQ sina Mandaluyong City Mayor Carmelita Abalos, Pateros Mayor Miguel Ponce III, Caloocan City Mayor Oscar Malapitan, at Taguig City Mayor Lino Edgardo Cayetano.
Gayunman, sa isang hiwalay na pahayag, sinabi kahapon ni Department of Interior and Local Government Secretary Eduardo Año na posibleng magpatupad na lamang ng selective lockdown sa ilang lugar sa Metro Manila simula sa Hunyo 1 sakaling magpasya ang pamahalaan na tuluyan na ring tanggalin ang MECQ sa Mayo 31.
Sinabi ni Año na mas aplikable ang ganitong setup upang mapayagan ang mga residente sa rehiyon na makapag-adjust sa ‘new normal’ dahil na rin sa patuloy pa ring problema na nararanasan dahil sa coronavirus disease 2019 (COVID-19) pandemic. Mer Layson
- Latest
