Duterte tinanggap ang sorry ng ABS-CBN
MANILA, Philippines — Tinanggap na kahapon ni Pangulong Rodrigo Duterte ang paghingi ng paumanhin ng ABS-CBN kaugnay sa isang political ad na banat sa kanya noong 2016 presidential elections.
“Yes. I accept the apology, of course,” ani Duterte.
Nauna rito, mismong si ABS-CBN president at chief executive officer Carlo Katigbak ang nag-sorry sa pagdinig ng Senado sa pagre-renew ng prangkisa ng ABS-CBN.
Sinabi pa ng Pangulo na maaaring i-donate na lamang ng network ang P2.6 milyon na dapat i-refund sa kanya matapos hindi ipalabas ang kanyang political ad. Bahagi ang nasabing pera ng P7 milyon na hindi kaagad nai-refund ng network.
Nang tanungin kung lalagdaan ng Pangulo ang panukalang batas tungkol sa pagre-renew ng prangkisa ng ABS-CBN, sinabi ng Pangulo na: “I will cross the bridge when I get there.”
Sinabi pa ng Pangulo na sinadya niyang dumistansiya sa isyu. Ang desisyon aniya tungkol sa prangkisa ay nasa House of Representatives at Senado.
“I tell you I am not going to interfere. Wala talaga,” dagdag pa ng Pangulo.
Sinabi rin ni Duterte na sa sandaling magbigay siya ng pahayag tungkol sa inihaing quo warranto petition ng solicitor general ay nakialam na rin siya sa isyu.
Kaugnay nito, naghain ng isang panukalang batas si Sen. Ramon Revilla Jr. na naglalayong i-extend ang prangkisa ng ABS-CBN hanggang Disyembre 31, 2020.
- Latest