Gamot kontra coronavirus ilalabas na
MANILA, Philippines — Inihayag ng pamahalaan ng Taizhou sa Zhejiang, China na ilalabas na sa merkado ang Favilavir, dating kilala sa tawag na Fapilavir bilang gamot kontra sa coronavirus o COVID-19.
Gawa ng Zhejiang Hisun Pharmaceutical Company ang nasabing gamot at inaasahang magiging solusyon para tuluyang mahinto ang coronavirus.
Ang Favilavir ang kauna-unahang gamot pangontra sa novel coronavirus na inaprubahan ng National Medical Products Administration.
Napaulat din na sa mga isinagawang clinical trials, ang Favilavir ang isa sa tatlong gamot na nagpakita ng bisa laban sa coronavirus.
Samantala, umakyat na sa 1,770 ang bilang ng nasawi sa coronavirus disease (COVID-19) sa China.
Ito ay makaraang makapagtala ng 105 panibagong bilang ng nasawi sa Hubei Province at sa iba pang bahagi ng mainland China sa nakalipas na magdamag.
Dahil dito umabot na sa 1,775 ang global death toll ng COVID-19 kabilang ang tig-iisang nasawi sa Hong Kong, Pilipinas, Japan, France at Taiwan.
Umabot naman na sa mahigit 71,000 ang bilang ng tinamaan ng sakit sa iba’t ibang panig ng mundo.
Sa nasabing bilang, mahigit 70,500 ay mula sa China. Pumapangalawa ang Japan sa may pinakamaraming kaso na umabot na sa 414 habang sumunod ang Singapore na mayroong 75 kaso at Hong Kong na mayroong 57 kaso.
- Latest
