Franchise bill ng ABS-CBN ‘di urgent - Kamara
MANILA, Philippines — Aminado si House Speaker Alan Peter Cayetano na hindi na kakayaning dinggin pa ng Kamara ang panukala para sa franchise renewal ng ABS-CBN bago ito mag-expire sa March 30, 2020.
Sinabi ni Cayetano na posibleng sa muling pagbabalik ng sesyon pagkatapos ng Holy Week Break o sa Mayo pa masisimulang talakayin sa House Committee on Legislative Franchises ang prangkisa ng giant broadcast network.
Ito ay dahil mas marami umanong urgent issue na kailangang unahin ng Kamara tulad na lamang ng supplemental budget at rehab plan sa Taal Volcano eruption at ang banta ng COVID-19.
Subalit paglilinaw ng Speaker, hindi ito nangangahulugan na hindi nila pinahahalagahan ang nasa 11,000 empleyado na posibleng maapektuhan ng pagsasara ng kumpanya.
Bilang patunay umano ay maaari pa rin naman kasing magpatuloy ng operasyon ang media network hanggang 2022 habang nakabinbin pa ang panukala para sa kanilang franchise.
Habang wala pang pagdinig na ginagawa ay hinikayat ni Cayetano ang mga pabor at tutol na magpalamig muna ng ulo sa usaping ito.
Dahil kung ipipilit umano ng komite ang hearing ay sigurado na magtatagal ito sa paglalahad pa lamang ng punto ng magkabilang panig.
- Latest