MANILA, Philippines — Nakapasok na sa Wuhan City, ang lugar na itinuturing na “ground zero” ng novel coronavirus, ang team ng Department of Foreign Affairs.
Inaasahang maibabalik na sa bansa ang nasa 45 Filipino kapag natapos ang isinasagawang proseso.
Nauna rito, sinabi ni Undersecretary Brigido Dulay na ngayong araw aalis sa Wuhan ang mga Filipino at inaasahang darating bukas.
Ang team ay pinamumunuan ni Mark Anthony Geguera at Sanny Darren Bejarin ng Philippine Consulate sa Shanghai.
Sa sandaling makabalik sa Pilipinas, dadalhin ang mga iuuwing OFWs sa Athlete’s Village sa New Clark City sa Tarlac kung saan isasailalim sila sa 14 days quarantine upang matiyak na hindi sila nagkaroon ng coronavirus.