Quo warranto ni Calida vs ABS-CBN walang basbas ni Duterte - Palasyo
MANILA, Philippines — Wala umanong basbas ni Pangulong Rodrigo Duterte ang plano ni Solicitor General Jose Calida na maghain ng quo warranto petition sa Korte Suprema na kumukuwestiyon sa ‘validity’ ng prangkisa ng ABS-CBN.
Sinabi ni Presidential Spokesperson Salvador Panelo, na ang binitiwang pahayag ni Calida ay personal dahil tungkulin niya ito bilang pinuno ng nasabing tanggapan.
Bagama’t nabasa na niya ang report, kailangan pa niyang kumpirmahin sa Solicitor General kung ang planong paghahain ng petisyon para bawiin ang prangkisa ng TV network ay binabalangkas pa o nagawa na.
Idinagdag ni Panelo na ang aksiyon ng OSG ay walang kinalaman sa naunang pahayag ni Duterte na dapat nang ibenta ang ABS-CBN dahil walang plano ang Chief Executive na i-renew ang prangkisa nito.
Samantala, sinabi ni Justice Secretary Menardo Guevara na hindi natatalakay sa Cabinet meeting ang quo warranto petition laban sa ABS-CBN.
Ayon kay Guevarra, ang legislative franchise ng TV network ay pahapyaw lang na tinalakay, ilang buwan na ang nakalilipas.
Magugunitang mainit ang Pangulo sa ABS-CBN dahil hindi ipinalabas ang kanyang political ads noong panahon ng kampanya kahit na nakapagbayad na siya, at sa halip ay mas pinaboran ang political ads ng kanyang kritiko na si dating senador Antonio Trillanes IV.
- Latest
