MANILA, Philippines – Nagdeklara na rin kahapon ng state of calamity ang lalawigan ng Cavite bunga ng matinding epekto ng pagputok ng Taal volcano.
Kinumpirma ito ni Cavite Governor Juanito Victor Remulla upang matugunan ang pangangailangan ng nasa 15,000 evacuees galing Batangas na pansamantalang kinukupkop sa kanilang lalawigan.
Una nang nagdeklara ng state of calamity ang lalawigan ng Batangas kung saan libu-libong evacuees ang nagsilikas sa kanilang mga tahanan.
Sinabi ni Remulla na nasa 8 barangay sa Tagaytay City ang saklaw ng 8-km radius danger zone.
Inihayag ng opisyal na nasa P15 M ang kanilang inilaang pondo para sa pangangailangan ng mga bakwit.?
Bukod sa mga evacuation centers maging ang mga kabahayan ng mga kamag-anak ng mga bakwit sa Cavite ay pinuntahan ng mga ito para pansamantalang makituloy.