‘Solons, bahala kayo’- Digong
Sa term sharing sa Speakership
MANILA, Philippines – Ipinauubaya ni Pangulong Rodrigo Duterte sa mga kongresista ang desisyon kung itutuloy pa nila ang term-sharing agreement nina House of Representatives Speaker Alan Peter Cayetano at Marinduque Rep. Lord Allan Velasco.
Magugunita na si Pangulong Duterte ang namagitan sa term-sharing deal nina Cayetano at Velasco.
“Nasa inyo na ‘yan (It’s up to you) if the parties would honor. I’m not forcing anybody to take a stand. It’s your choice because the agreement and the choice is yours. Cause you can make or unmake the Speaker,” wika pa ng Pangulo sa kanyang mensahe kamakalawa ng gabi sa joint birthday celebration nina Velasco at maybahay nitong si Wen.
Sa ilalim ng term-sharing agreement ay unang magsisilbi si Cayetano bilang speaker sa loob ng 15 buwan habang si Velasco naman ang susunod sa natitirang 21 buwan.
Ilang kaalyado ni Cayetano ang nagpalutang na hindi na dapat ituloy ang term-sharing agreement at ipaubaya na lamang ni Velasco ang speakership kay Cayetano.
Siniguro naman kamakalawa ni Cayetano kay Velasco na tuloy ang kanilang term-sharing at walang dapat ipag-alala si Velasco sa kanilang kasunduan.
- Latest
