MANILA, Philippines — Iginiit kahapon ni Cabinet Secretary Karlo Nograles na ang gobyerno ay mas pursigidong gumawa ng mga patakaran upang supilin ang gutom sa bansa kasunod ng lumabas na datos na nagpapakitang bumaba ng 4.2% taon-taon ang mga pamilyang nakararanas ng involuntary hunger.
Kanyang idiniin nitong Linggo na, batay sa mga numerong ito, positibong nakikita ng administrasyong Duterte na “ito ay indikasyon na nakakamit ng gobyerno ang ninanais na mga layunin dahil sa patakarang ipinatutupad nito.”
Batay sa inilabas na survey kamakailan ng Social Weather Stations (SWS) na isinagawa noong Setyembre 27 - 30, 2019, 9.1% o tinatayang nasa 2.3 milyong pamilya ang nakaranas ng involuntary hunger sa nakalipas na tatlong buwan.
Gaya ng tinukoy ng SWS, ang “involuntary hunger” ay nangangahulugang “gutom na nararanasan ng isang pamilya dahil sa kakulangan ng pagkain na maisusubo.”
Ayon kay Nograles, ang mga bagong numero ay mas mababa kumpara noong September 2018 SWS data na makikitang 13.3% o tinatayang nasa 3.3 milyong pamilya ang nakaranas ng involuntary hunger.
“Mas bumaba o komonti ng isang milyong pamilya ang nakararanas ng gutom, numerong sinisikap natin na mas pababain pa sa pamamagitan ng Enhanced Partnership Against Hunger and Poverty (EPAHP) – isang inisyatibo ng pamahalaan na kumbinsido tayong makatutulong sa Pilipinas para makamit ang ating minimithing #GoodbyeGutom,” ayon pa sa opisyal ng Palasyo.
Layunin ng EPAHP na maibsan ang gutom, tiyakin na may sapat na pagkain at seguridad sa nutrisyon, at mabawasan ang kahirapan sa urban at mga rural communities, kabilang na ang mga mahihirap na komunidad.