Recycling ng illegal na droga talamak pa rin
MANILA, Philippines — Kinumpirma kahapon ni Philippine Drug Enforcement Agency (PDEA) Director General Aaron Aquino na talamak pa rin ang recycling ng illegal na droga mula sa mga buy-bust operations.
Sa budget hearing ng pondo ng PDEA para sa 2020, tinanong ni Senate Minority Leader Franklin Drilon ang ahensiya kung nangyayari pa rin ang recycling ng ilegal na droga.
Ayon kay Aquino, may mga impormasyon sila mula sa kanilang assets na ginagawa pa rin ang recycling ng ibang ahensiya ng gobyerno.
Ipinaliwanag ni Aquino may mga pagkakataon hindi isinusuko ang kabuuan ng nahuhuling droga at itinatabi ang kahalati nito para magamit sa susunod na operasyon o kaya ay ibinebenta.
Inamin din ni Aquino na nasa P22 bilyong halaga ng ilegal na droga kung saan ang P20 bilyon ay shabu na nananatili sa inventory ng gobyerno at hindi pa nasisira.
Ayon kay Senator Panfilo “Ping” Lacson dapat ay sinisira na ang nakumpiskang ilegal na droga sa loob ng 72 oras.
Aminado rin ang Philippine National Police na nangyayari ang ibinunyag ng PDEA na talamak pa rin ang recycling ng illegal na droga ng mga tiwaling pulis, ayon kay PNP Spokesman Brig. Gen. Bernard Banac, ito ang pangunahing dahilan kung bakit pursigido ang PNP sa internal cleansing upang tanggalin ang mga bugok na pulis na nagsisilbing batik sa hanay ng organisasyon.
- Latest
