MANILA, Philippines — Isinusulong na gawing sabay-sabay ang pagbubukas ng klase sa lahat ng eskuwelahan sa bansa.
Sa Senate Bill 545 ni Sen. Juan Miguel Zubiri, gusto nitong magkaroon ng batas na magtatakda sa pagbubukas ng klase sa lahat ng paaralan tuwing ikalawang Lunes ng Agosto at hindi lalampas sa ikalawang linggo ng Setyembre.
Layunin ng panukala ni Zubiri na i-harmonize ang pagbubukas ng klase sa lahat ng eskuwelahan at i-synchronize ang academic o school calendar year ng Pilipinas sa ibang eskuwelahan sa mundo.
Sa kasalukuyan, sinusunod pa rin ng Pilipinas ang Hunyo hanggang Marso na school calendar samantalang ang karamihan sa mga educational institutions sa buong mundo ay mula Agosto hanggang Setyembre kada taon.
Ipinunto ni Zubiri na kung magkakasabay-sabay ang academic calendar, magkakaroon ng pagkakataon ang lahat ng mga eskuwelahan, estudyante at faculty members na makilahok at magkaroon ng benepisyo sa mga research activities, exchange programs, at training programs mula sa mga educational institutions sa ibang bansa.