MANILA, Philippines — Magkakaloob ang Armed Forces of the Philippines (AFP) at Philippine National Police (PNP) ng free viewing sa laban ni Pambansang Kamao Manny “Pacman” Pacquiao kontra undefeated boxer Keith Thurman sa Sabado ng gabi sa MGM Arena sa Las Vegas, Nevada, USA (Linggo ng umaga sa Pilipinas).
Sinabi ni AFP Public Affairs Office Chief Col. Noel Detoyato, ang free live screening ay gaganapin sa iba’t ibang venue sa General Headquarters sa Camp Aguinaldo kabilang ang Security Escort Group Mess Hall at AFP Commissioned Officers Club (AFPCOC).
Naglaan din ang Philippine Army ng tatlong venue sa live screening sa Ricarte Hall ng Army Clubhouse, Multi-Purpose Hall ng Army Hospital at Army Wellness Center.
Ang AFP Medical Center ay may free viewing sa auditorium para sa mga combat hero o mga sugatang sundalo na nagpapagaling sa nasabing pagamutan habang ang Philippine Air Force ay sa Villamor Air Base at iba pang mga base nito sa bansa.
Sa Camp Crame, ipinag-utos naman ni PNP Chief Police General Oscar Albayalde ang free viewing para sa mga pulis at kanilang mga dependents sa Multi-Purpose Hall ng Camp Crame.