MANILA, Philippines – Tiniyak ni PNP Chief General Oscar Albayalde na 100 porsiyento na ang level of preparation ng kapulisan kaugnay ng gaganaping State of the Nation Address (SONA) ni Pangulong Duterte sa Lunes, Hulyo 22.
Itataas na rin ng PNP sa full alert status ang 195,000 puwersa nito umpisa alas-6 ng umaga sa Sabado.
Nasa 14,000 pulis ang idedeploy sa SONA kung saan 8,500 dito ay pupuwesto sa mismong venue malapit sa Batasan Complex at security sites.
Ang karagdagang 1,000 ay augmentation forces kabilang na ang tropa ng mga sundalo.
Inihayag ni Albayalde na wala silang natatanggap na security threat pero mas mabuti na ang nakahanda sa lahat ng oras upang mapigilan ang mga grupong posibleng manabotahe sa SONA.
Sinabi nito na maghihigpit sila sa seguridad kabilang na ang pagpakalat ng intelligence monitoring team sa rally site upang mabigyang proteksyon ang mga demonstrador na mapasukan ng mga inflltrators mula sa komunistang grupo.
Ipatutupad din ang pagpatay ng mga cellphone signal habang ipagbabawal ang pagpapalipad ng mga drones sa mga sibilyan at tanging security forces lamang ang may kapangyarihang gawin ito.