Apela sa mga sundalo at pulis
MANILA, Philippines — Umapela si Pangulong Duterte sa mga sundalo at pulis na huwag mag-kudeta sa kanyang termino.
“I know that the Armed Forces and the Police will have to decide one day somehow. Do not do it please during my term,” pahayag ng Pangulo sa mga opisyal at sundalo sa anibersaryo ng Philippine Air Force (PAF) kamakalawa ng gabi sa Villamor airbase, Pasay City.
Sinabi ng Pangulo, kung ayaw na sa kanyang pamumuno ng mga sundalo at pulis ay kausapin lamang siya at handa siyang bumaba sa puwesto.
“I told you before all you have to do kung ayaw ninyo ako, do not bring your weapons and mechanized armors there. Just call me and we’ll have coffee and I am ready to say, ‘It’s yours for the taking,’” dagdag niya.
Binigyang-diin pa ng Pangulo, kahit walang kudeta ay makukuha ng militar at pulis ang poder mula sa kanya pero tiwala siyang hindi ito gagawin sa kanya ng mga sundalo at pulis.
Inanunsiyo din ni Pangulong Duterte na inaprubahan niya ang kahilingan ng AFP commanders para sa modernisasyon ng Armed Forces.