Manila Water pinagmulta

Dahil sa krisis sa tubig

MANILA, Philippines — Pinatawan ng Metropolitan Waterworks and Sewerage System (MWSS) ng multang mahigit P1 bilyon bilang parusa ang pribadong water concessionaire na Manila Water dahil sa krisis sa tubig sa Metro Manila at Rizal noong nakaraang buwan.

Naunang kinumpirma ng MWSS na lumabag ang Manila Water sa obligasyon nito sa ilalim ng concession agreement na magbigay ng tuluy-tuloy na serbisyo sa mga customer nito sa  east concession zone.

Dahil sa naging kakapusan ng suplay sa tubig, ipinahayag ng Manila Water na hindi ito maniningil ng minimum o basic charge para sa buwan ng Marso. Ang voluntary at one-time bill waiver scheme ay sumasaklaw sa first 10 cubic meters na nakokonsumo sa isang buwan.

Ang multa na ipinataw sa Manila Water ay bukod pa sa P500 milyong ibabalik sa mga konsyumer sa pamamagitan ng  one-time bill waiver scheme nito.

Nagpahayag naman ang Manila Water na susunod ito sa utos ng MWSS sa pagpataw nito ng financial penalty.

Kaugnay nito, iginiit kahapon nina Senators Francis “Kiko” Pangilinan at Aquilino “Koko” Pimentel na dapat direktang mapunta sa mga naapektuhang consumers ang mahigit P1 bilyon ipinataw ng MWSS Board sa Manila Water dahil sa krisis sa suplay ng tubig na nagsimula noong Marso.