March bill ililibre ng Manila Water
MANILA, Philippines — Kusang magbibigay ang Manila Water ng “one-time bill waiver” sa bayarin ng tubig para sa buwan ng Marso sa kanilang mga customer.
Sinabi ni Manila Water President and CEO Ferdinand dela Cruz, na boluntaryo nilang ipatutupad ang minsanang waiver at makikita ito sa matatanggap na bill sa Abril bilang ayuda sa mga customer na labis na naapektuhan ng malawakang pagkaantala ng serbisyo ng tubig.
“Naiintindihan namin ang matinding kabiguang naramdaman ng aming mga customer nitong nakaraang 3 linggo. Sa aming kagustuhang makatulong sa pagpapagaan ng abalang naidulot ng matinding kawalan ng tubig, at sa gabay na rin ng parehong MWSS Corporate Office at Regulatory Office, magkakaloob kami ng dalawang lebel ng ‘waiver’ para sa mga customer,” sabi ni dela Cruz.
Una, lahat ng customer ay mapagkakalooban ng kaltas ng “minimum charge”. Ikalawa, ang mga customer sa mga barangay na nakaranas ng lubos na kawalan ng serbisyo sa tubig nang pitong araw o higit pa, tuloy-tuloy man o hindi, sa pagitan ng Marso 6 hanggang 31, 2019 ay hindi na sisingilin ng kabuuan ng kanilang bayarin sa buwang ito, dagdag ni dela Cruz.
Nakapaloob sa ‘minimum charge’ na kumakatawan sa 10 cubic meters ng tubig, ang singil sa serbisyong pantubig, pang-alkantarilya, at programang pangkalikasan.
Ang tipikal na ‘minimum charge’ ay nagkakahalaga sa pagitan ng P76 kada buwan para sa mga ‘lifeline customer’ na mababa lang ang konsumo, hanggang P656 sa mga ‘industrial customers’.
Ang mga ‘lifeline customers’ ang lubos na makikinabang sa ‘waiver’ na ito dahil ang ‘minimum charge’, na siya ring buwanang singil sa kanila, ay hindi na pababayaran.
And kabuuang bill waiver ay nagkakahalaga ng P150M.
Maaalalang nakaranas ang mga customer ng Manila Water ng malaking kaabalahan simula noong Marso 6 bunsod ng ‘water shortage’ na nag-udyok sa kumpanya na magpatupad ng mga nakatakdang “service interruptions” para muling mapunuan ang 28 nitong ‘network reservoirs’.
Sa kasalukuyan, nagpupursige pa rin ang Manila Water na maibalik ang 24/7 supply ng tubig sa lahat ng customers, kahit sa mas mahinang ‘pressure’.
- Latest