MANILA, Philippines — Ibinunyag kahapon ng isang mataas na opisyal ng Armed Forces of the Philippines na isang dating estudyante ng Ateneo de Davao ang isa sa mga tumatayong lider ng mga rebeldeng New People’s Army (NPA) sa Northeastern Mindanao.
Ayon kay AFP Eastern Mindanao Command (AFP-Eastmincom) Chief Major Gen. Felimon Santos Jr., patuloy ang recruitment ng NPA sa sektor ng mga estudyante.
Sinabi ng heneral na, sa kasalukuyan, ang dating estudyante ng Ateneo de Davao na si Alvin Luque na may ilang taon nang nawawala ay natuklasang na-recruit ng NPA at isa na sa mga lider ng NPA sa Northeastern Mindanao.
Tinukoy rin ni Santos na ilan pa sa mga estudyanteng nalinlang ng NPA ay sina Ryan Edpan Cagula, estudyante ng UP Mindanao na sumapi sa NPA at napatay sa engkuwentro sa Maasim, Sarangani noong Nobyembre 4, 2014.
Ang isa pa na si Prince Wendel Olorfenes na responsable sa pag-atake sa himpilan ng Mati Police noong Pebrero 14, 2015 ay isa ring estudyante ng University of Mindanao nang ma-recruit ng teroristang grupo.
Kasabay nito, nanawagan naman si Santos sa mga magulang at mga opisyal ng mga kolehiyo at unibersidad ng mga kabataang estudyante na bantayang mabuti ang mga ito “upang hindi malinlang ng komunistang grupo.”