PNP mananatiling nakaalerto
MANILA, Philippines — Mananatiling nakaalerto at hindi na magpapalinlang ang mga elemento ng Philippine National Police sa kabila ng idineklarang unilateral ceasefire ng Communist Party of the Philippines–New People’s Army (CPP-NPA) ngayong kapaskuhan.
Sinabi ni PNP Spokesman Chief Supt. Benigno Durana Jr. na mahabang panahon nang ginagamit lamang sa pagsasamantala sa paglulunsad ng karahasan ng CPP-NPA ang idinedeklarang unilateral ceasefire ng pamahalaan.
Aniya, hindi na ngayon magpapaloko pa ang PNP operatives sa patibong ng komunistang grupo dahil wala ang mga itong isang salita at sinseridad.
Ang CPP-NPA ay nagdeklara ng limang araw na unilateral ceasefire na oobserbahan mula alas -12:01 ng Disyembre 24 hanggang Disyembre 26 at mula alas-12:01 ng madaling araw ng Disyembre 31, 2018 hanggang alas -11:59 ng gabi ng Enero 1, 2019.
Una na ring sinabi ng Armed Forces of the Philippines at ni Defense Secretary Delfin Lorenzana na hindi sila magrerekomenda kay Pangulong Rodrigo Duterte na magdeklara ng unilateral ceasefire dahil sa kawalang sinseridad ng communist rebels na patuloy sa paghahasik ng terorismo.
- Latest
