MANILA, Philippines — Anim na buwan bago ang midterm elections sa Mayo 2019, nasa 18 mga pulitiko at kandidato na ang nasawi at nasugatan na pinaniniwalaang may kinalaman sa mahigpit na labanan sa pulitika, ayon sa Philippine National Police (PNP).
Sa 18 kaso ng mga nasawi at nasugatang mga pulitiko, 5 dito ang alkalde, 4 ang gobernador, isang kongresista, 4 bgy. chairman, 3 vice mayor at isang bgy. councilor.
Sa Region 7 o Central Visayas nagmula ang pinakamaraming bilang ng mga alkalde na nasasawi sa pananambang.
Naitala naman sa 60 insidente ng may matinding banggaan sa pulitika ang mahigpit na binabantayan ng PNP kabilang dito ay 53 magkakalabang mga alkalde, 2 sa posisyon ng gobernador, isa sa puwesto ng congress at apat sa mayoralty race.
Karamihan dito ay sa Region 1, Region IV A at Autonomous Region in Muslim Mindanao (ARMM).
Sinabi ni PNP spokesman P/Chief Supt. Benigno Durana Jr., bagaman ‘security concern’ ang mga kaso ng pananambang ay hindi pa ito maituturing na nakababahala.