Mag-asawang Cayetano pinapa-disqualify sa Comelec
MANILA, Philippines — Pinapadiskwalipika sa Commission on Elections (Comelec) ang mag-asawang sina dating DFA secretary Alan Peter Cayetano at Taguig City Mayor Lani Cayetano sa 2019 elections dahil sa isyu ng residency.
Nabatid na naghain ang isang concerned citizen na si Leonides Buac upang hilingin sa Comele na ibasura ang inihaing Certificates of Candidacy (COC) ng mag-asawa.
Sinabi ni Buac na hindi maaaring tumakbo sa pagka-kongresista sa magkahiwalay na distrito ang mag-asawang Cayetano dahil maaari lamang magmantine ang mga ito ng iisang legal residence.
Sa inihaing COC ng mag-asawa, nabatid na si Cayetano ay tumatakbo bilang mambabatas ng unang distrito ng Taguig City, habang ang kanyang maybahay naman na si Mayor Lani ay nais na maluklok sa second congressional district ng lungsod, gamit ang magkahiwalay na address.
“The usual place of abode of the husband and wife, as jointly fixed by them, is their one legal residence for the purpose of running for public office,” ayon sa petisyon.
Nakasaad din na ang isang mag-asawa ay maaari lang manirahan sa iisang lugar.
Tinawag pa ni Atty. George Garcia, abogado ni Buac, ang mga Cayetano na “super dynasty” na naglalayong magpalawig ng kanilang teritoryo.
Sa pahayag naman ng mag-asawang Cayetano, ang diskuwalipikasyon ay labag sa kagustuhan ng kanilang mga constituents sa Taguig at Pateros na makapagbigay pa ng serbisyo.
Handa silang sagutin punto por punto ang isyu nasabing petisyon.
- Latest