MANILA, Philippines — Hinikayat kahapon ni Sen. Nancy Binay ang Bureau of Customs (BOC) na ibigay na lamang sa Department of Social Welfare and Development (DSWD) ang nasa P200 milyong halaga ng smuggled rice na nasakote ng ahensiya upang mapakinabangan ng mga biktima ng habagat.
Nasakote ng BOC ang nasa 50,000 sako ng bigas na nagkakahalaga ng P175 milyon noong nakaraang Lunes, bukod pa sa 10,000 sako na nakuha naman sa isang warehouse sa Laguna noong Hulyo.
Sinabi ni Binay na sa halip na mabulok lamang ang mga nasabing bigas o kaya ay ipagbili ito, dapat ay ikonsidera ang kapakanan ng libu-libong mamamayan na naapektuhan ng mga nagdaang bagyo at ng habagat.
Bukod aniya sa makakatulong ang BOC sa relief efforts ng DSWD, maiiwasan pa ang pagkabulok ng mga saku-sakong bigas.