Digong bigo sa PDP-Laban
‘Kanya-kanya na kayo’
MANILA, Philippines — Nabigo si Pangulong Duterte na mapagkaisa ang nag-aaway na paksyon ng PDP-Laban sa isinagawang 5 oras na meeting kamakalawa ng gabi sa isang hotel sa Maynila.
Ayon sa Pangulo, kung hindi magkakasundo ang mga paksyon ay mabuting magkanya-kanya na sila.
Sinabi ni Presidential Spokesman Harry Roque, magkahiwalay na kinausap ni Pangulong Duterte ang paksyon nina Atty. Rogelio Mercado at Sen. Koko Pimentel sa nasabing caucus subalit walang napagkasunduan hinggil sa magiging liderato nito para mamuno sa partido.
“Sabi po ni Presidente mag usap-usap sila, usap-usap lahat, at pagkatapos, I think sa Setyembre magpupulong uli; tapos kung talagang hindi kakayaning magkasundo ay puwede naman pong maghiwa-hiwalay. Pero ngayon po, ang sabi niya ay mag-usap muna ang lahat ng mga tao na nasa loob ng Partido,” sabi ni Roque kahapon.
Sinabi naman ni Special Assistant to the President Bong Go, pinayuhan nito ang magkabilang-panig na ayusin ang kanilang sigalot at magkaisa.
“Tulad ng isang ama na pilit pinagbabati ang mga anak na may hindi pagkakaintindihan, namagitan si Pangulong Rodrigo Duterte sa mga miyembro ng PDP-Laban upang magkaisa ang lahat para sa kabutihan ng partido. Hinimok nya ang mga lider ng magkabilang grupo na unahin ang kapakanan ng bayan sa lahat ng kanilang magiging desisyon,” paliwanag ni Go.
Dahil dito, magkakaroon pa ng panibagong pagpupulong ang miyembro ng partido na mayroong alitan sa susunod na buwan.
- Latest