MANILA, Philippines — Pinalalagyan na rin ni Pangulong Duterte ng health warning o babala sa kalusugan ang mga sugar-based juices at beverages tulad ng health warning sa mga sigarilyo.
Sinabi ni Trade and Industry Sec. Ramon Lopez na nais ng Pangulo na ipaalam sa mga mamimili hindi lamang ang mga benepisyong makukuha nila sa mga binibiling produkto kundi maging ang posibleng masamang epekto ng sobrang sugar sa katawan.
Ayon kay Lopez, gusto ni Pangulong Duterte na mailagay sa harap ng anumang produktong may asukal ang babala para agad itong makita o mabasa ng mga mamimili.
Sa ilalim ng Tax Reform for Accelaration and Inclusion (TRAIN) Law ay papatawan ng P6 per liter na excise tax ang mga sugar-sweetened beverages gayundin ang mga carbonated beverages, sports at energy drinks habang P12 per liter naman sa mga drinks na may high-fructose corn syrup habang ang 3-in-1 coffee at gatas ay exempted naman sa excise tax.
Nakapaloob sa TRAIN Law na dahil sa mataas na content ng sugar sa nasabing mga inumin ay nagiging dahilan ito para sa type 2 diabetes batay sa mga pag-aaral.
Sa susunod na isa hanggang dalawang buwan ay kailangang maipatupad na ang nasabing babala sa mga produktong may asukal, ayon pa kay Lopez.