‘P18M Intramuros project ng DOT hindi ipinatupad’- COA
Kahit may pondo na
MANILA, Philippines — Hindi pa rin naipapatupad hanggang katapusan ng taong 2017 ang P18 milyong proyekto para maipakilala ang Intramuros sa Maynila bilang tourist destination kahit naipalabas na ang pondo nito noon pang Enero 2016.
Ito ang ibinunyag ng Commission on Audit sa bago nitong report na inilathala sa website nito.
Ayon sa report, inilipat ng Department of Tourism ang P18 milyong pondo sa ahensiya nitong Intramuros Administration noong Enero 18, 2016 para sa branding campaign project ng huli na tinawag na “Promise and Possibilities in Intramuros.”
Layunin ng proyekto na itaguyod at tatakan ang Intramuros bilang pangunahing tourist destination at hikayatin ang mga potensiyal na mamumuhunan na lumahok sa pagpapaunlad nito.
Binanggit ng COA na tinawagan na nito ang atensiyon ng pangasiwaan ng IA kaugnay ng kabiguan nitong ipatupad ang proyekto kahit may pondo na. Pero lumitaw sa ebalwasyon na hindi pa rin ito naipapatupad kahit noong 2017.
Sa halip, ayon sa report, P450,112.19 o 2.50% ng naturang budget ang ginamit sa pagbili lang ng 30 memo pad na may IA logo, anim na kahon ng file envelope at iba’t-ibang bond paper na may IA logo at sa pagdaraos ng ‘El Museo Del Prado En Filipinas” exhibit.
Samantala, itinalaga ni Tourism Secretary Bernadette Romulo-Puyat si Undersecretary Benito “Bong” Bengzon Jr. bilang bagong tagapagsalita ng DoT.
Si Bengzon din ang Undersecretary for tourism and development planning.
Pinalitan ni Bengzon si Assistant Secretary Frederick Alegre na nagbitiw sa puwesto matapos na pagbitiwin ni Puyat ang lahat ng appointees ni dating Tourism secretary Wanda Tulfo-Teo.
Ayon kay Romulo-Puyat, bilang career official, si Bengzon ay exempted sa kanyang inilabas na order dahil 30 taon na itong nagtatrabaho sa DoT.
Inaasahan din mababakante ang puwesto nina Undersecretaries Katherine de Castro, Alma Rita Jimenez, Marco Bautista, at Pompee La Viña; at mga Assistant Secretaries na sina Maria Lourdes Japson, Daniel Mercado, Eden Josephine David, at Arlene Mancao.
- Latest