BOE sa SK kagawad ipinanukala

MANILA, Philippines — Nakahain sa Kongreso ang isang panukalang batas na naglalayong bigyan ng Barangay Official Eligibiity (BOE), katumbas ng ‘basic civil service eligibility’ ang mga halal at itinalagang mga kagawad ng Sangguniang Kabataan na nakumpleto ng buo ang nakatakdang paglilingkod nila sa tungkulin, ayon sa itinatalaga ng batas.

 Ayon kay Albay Rep. Joey Sarte Salceda, na siyang may-akda ng House Bill 7719, ang BOE para sa kwalipikadong mga opisyal ng SK ay “ituturing na sapat na kwalipikasyon” para makapagtrabaho sa gobyerno, maliban sa mga pwestong saklaw ng espes­yal na mga batas o nangangailangan ng lisensiya o mga natatanging teknikal na kahandaan.

Ipinaliwanag ni Salceda na layunin ng HB 7719 ang isulong at patibayin ang partisipasyon ng mga kabataan sa pagtatatag ng matibay at maunlad na bansa, itanim at palaguin sa puso at diwa nila ang tamang moralidad at pagiging tapat, makaba­yan, makatao at iba pang kanais-nais na mga kaugalian, at pakikilahok sa mga panlipunang gawain.

Sa kasalukuyan, ta­nging mga halal na Punong Barangay, mga Kagawad ng Sangguniang Barangay, Sangguniang Kabataan Chairmen; at mga hinirang ng Barangay Chairman na Barangay Treasurer ang kasali sa BOE.