Nasawi sa sunog sa Manila Pavilion 5 kumpirmado, 1 kritikal
MANILA, Philippines — Limang katao ang kumpirmadong nasawi habang isa pa ang kritikal sa naganap na sunog kamakalawa ng umaga sa Waterfront Manila Pavilion Hotel and Casino, sa Ermita, Maynila.
Ayon sa ulat na inihayag sa idinaos na pulong-balitaan, na pinangunahan ng Philippine Amusement and Gaming Corporation (PAGCOR), Manila Police District (MPD), Bureau of Fire Protection (BFP) at mga opisyal ng Manila Pavilion, kinilala ang mga nasawi na sina Billy De Castro, Edilberto Braga Evangelista, Marlyn Omadto, John Mark Sabido at Cris Sabido.
Habang nabatid naman na patuloy pang nakikipaglaban kay kamatayan ang biktimang si Jennelyn Figueroa, empleyado rin ng PAGCOR.
Inihayag naman ni Senator Sherwin Gatchalian na pansamantalang ititigil muna ang operasyon ng Manila Pavilion.
Nabatid na ang nasabing hotel ay pag-aari ng pamilya ng senador.
Ayon kay Gatchalian, mas mabuti na ang nag-iingat at tingnan kung ligtas ang mga pasilidad para na rin sa kanilang mga bisita.
Tiniyak naman ng management ng hotel na makikipagtulungan sila sa imbestigasyon at magbibigay sila ng ayuda sa pamilya na naapektuhan ng sunog.
Nabatid naman na umabot sa mahigit isang araw bago idineklarang ‘fire-out’ ang naturang sunog.
- Latest
