Maraming Pinoy mas gusto ang trabaho kaysa pag-ibig - SWS
MANILA, Philippines — Tatlo sa bawat limang Pilipino ang mas pinipili ang trabaho kaysa pag-ibig, ayon sa pinakabagong survey ng Social Weather Stations (SWS).
Sa 1,200 na tinanong sa survey, 59% ng mga Pilipino ang mas pipiliin ang career habang 41% naman ang mas pipiliin ang love life.
Lumabas din sa nasabing pag-aaral na 57% ng respondents ang nagsabing masaya sila sa kanilang buhay-pag-ibig, 29% ang nagsabing maari pang maging masaya habang 14% ang nagsabing wala silang love life.
Samantala, 58% naman ang sumagot na kayang pagsabayin ang trabaho at pag-ibig, 26% ang nagsabing maari itong pagsabayin, 5% ang nasabing maaaring hindi ito mapagsabay, habang 3% ang sumagot na tiyak na hindi ito kayang pagsabayin.
Dagdag pa dito, karamihan naman sa 60% ng mga babae at 57% ng mga lalaki ang mas pipiliin ang trabaho kaysa pag-ibig.
Mas pinipili din ng mga single, mapalalaki man o babae, ang career kaysa sa lovelife samantalang 63% ng mga kalalakihan at 50% ng mga kababaihan ang nagsabing masaya sila sa kanilang buhay-pag-ibig.
Ayon pa sa survey, ang mga lalaking single na mula edad 18-34 ay mas masaya sa kanilang mga lovelife kumpara sa 28% ng mga babaeng single sa parehong edad.
Mas marami naman ang walang pag-ibig sa mga matatandang single kaysa sa mga mas batang mga walang asawa.
Ginawa ang nasabing pag-aaral mula December 8-16 nitong nakaraang taon.
- Latest