MANILA, Philippines - Nakumpirma sa mga satellite image na kuha ng American think tank ang presensya ng mga barko ng China malapit sa Pag-asa island ngayong linggo.
Batay sa nakuhang imahe noong Agusto 13 ng Asia Maritime Transparency Initiative of the Center for Strategic and International Studies (AMTI), siyam na Chinese fishing vessels at dalawang Chinese Navy ships ang nasa malapit ng Pag-asa island.
Ayon sa AMTI, imposible raw matukoy kung ang mga barkong ito ay may kaugnayan sa maritime militia ng China, pero ang dalawa raw sa mga ito ay tila nangingisda lamang.
Magugunita na nitong linggo lang sinabi ni Magdalo Rep. Gary Alejano na may natanggap siyang mga impormasyon mula sa kanyang military sources hinggil sa aniya’y kahina-hinalang mga Chinese boats sa hilagang bahagi ng Pag-asa island.
Sinabi din ni DFA Sec. Alan Peter Cayetano na walang ibig sabihin ang sinasabing namataan na barko ng China sa West Philippine Sea kaya walang dapat ikabahala pero hindi daw nangangahulugan na isinusuko ng bansa ang ipinaglalabang teritoryo ng Pilipinas sa WPS.
Ayon kay DFA spokesman Robespierre Bolivar, hihintayin muna ng DFA ang opisyal na report ng military bago gumawa ng aksyon ang DFA.