NORTH COTABATO, Philippines – Napatay ang 50-anyos na lalaki matapos itong pagbabarilin ng hindi kilalang gunman sa bahagi ng Sitio Lumayong, Brgy. Kayaga sa bayan ng Kabacan, North Cotabato kahapon ng hapon.
Kinilala ni P/Senior Insp. Ronnie Cordero, hepe ng Kabacan PNP ang biktima na si Adin Macainas Manto ng Brgy. Manili sa bayan ng Carmen.
Batay sa ulat, pauwi na ang biktimang sakay ng motorsiklo na minamaneho ng kanyang anak na si Amid Manto mula sa Barangay Poblacion nang buntutan at ratratin ng riding-in-tandem gunmen.
Napatay ang biktima habang nakaligtas naman ang anak nito.
Narekober sa crime scene ang ilang basyo ng bala ng cal. 45 pistol habang sinisilip naman ang anggulong rido ang isa sa motibo sa pamamaslang.