MANILA, Philippines – Pang-apat na disqualification case na ang isinampa laban kay Sen. Grace Poe dahil sa kanyang pagtalikod sa kanyang Filipino citizenship at pagtanggap ng US citizenship, kadikit ng kanyang pagtakbo para maging presidente sa halalan 2016.
Isinampa ni Amado Valdez, dean ng College of Law ng University of the East ang pang-apat na petisyon laban sa kandidatura ni Poe sa Comelec.
Nauna nang nagsampa ng kaso sina De La Salle University political science Prof. Antonio Contreras, isang mahigpit na kritiko ng administrasyong Aquino, Atty. Estrella Elamparo at dating senador Kit Tatad, adviser ni VP Jejomar Binay.
Sinabi ni Dean Valdez na hindi na kwalipikado si Poe na tumakbo para maging pangulo dahil isinuko na niya ang kanyang pagiging natural-born citizen nung naging US citizen siya. Hindi rin daw residente ng 10 taon dito sa Pilipinas si Poe, isang kwalipikasyon na nakasaad sa Saligang Batas.
Itinanggi naman ng mga nagsampa ng kaso na may mga political backer sila kaya’t kinasuhan nila si Poe.