Mga e-bike sa talisay hayan duna nay regulasyon

CEBU, Philippines — Gipaabot nga mopagawas og rekomendasyon ang City of Talisay Traffic Operation Development Authority CT-TODA sa Dakbayan sa Talisay human napahigayon ang tigum sa tulo ka cluster sa mga barangay nga adunay E-bike nga nagdagan sa kadalanan.

Gibutyag ni Jonathan Tumulak, ang pangulo sa CT-TODA nga ilang usahon ang rekomendasyon nga nakuha gikan sa tulo ka cluster aron makahimo sila og mga regulations aron iduso ngadto sa konseho sa siyudad alang sa ilang session nga himoon.

Niadtong Martes, maoy katapusan nilang cluster meeting nga gitambogan sa mga barangay kapitan ug uban usab sa ABC President aron makapagawas sila ug rekomendasyon may kalabutan sa problema sa E-Bike. Dugang pa ni Tumulak, sa maong recommendation o suggestion gipaabot nila nga makapagawas ang kagamhanan karong buwana o sunod buwan sa regulations nga maoy tamdan sa mga e-bike driver.

Pipila sa mga suggestions ug gipaabot nga malakip unya sa iduso nga regulations kinahanglan walay minor de edad nga driver, bisan kinsa makahimo sa pag drive ma babaye man o lalaki basta rehistrado sa barangay kun asa siya nagmaneho lakip usab ang operator niini.

Kinahanglan ang mga operator naa usab siyay iduso nga listahan kung pila ka unit ang anaa siya ug lakip sa i-regulate kung pila ang pletihan.

Gitug-an ni Tumulak, nga kinahanglan dunay color coding matag barangay aron ilang masayran kung ang maong e-bike rehistrado ba.

Samtang una makamaneho ang mga e-bike driver mopaubos una sila ug traffic education. Ang mga barangay nga dunay representante sa tigum mao ang San Roque, Tangke, Cansojong, Poblacion, Biasong, Pooc, Mohon, Lawaan 2, Lagtang,Tabunok, Bulacao, San Isidro ug Dumlog. Nasayran ang dakbayan adunay dili mominos 4mil ka mga E-bike nga nagdagan ug pinaagi sa maong paghashas posibleng maminosan na unya kini pinaagi sa mga regulations nga ipatuman. (BANAT NEWS)