Digital na paniniket ng LTO, aarangkada na!
Sisimulan na ng Land Transportation Office (LTO) ang kanilang ‘digitalization’ base na rin sa kautusan ni Pangulong Ferdinand Marcos Jr.
Kaya nga, ito na ang asahan ng mga motorista, dahil gagawin nang automated o digital na ang paniniket ng lahat ng law enforcers ng LTO sa buong bansa simula sa susunod na linggo.
Ipamamahagi na ng LTO sa kanilang mga law enforcers ang Law Enforcement Handheld Mobile Device na gagamitin para sa pagbibigay ng electronic Temporary Operators’ Permit (e-TOP).
Ibig sabihin, wala nang mga manual TOP na karaniwang ibinibigay sa mga motorista na may paglabag sa batas-trapiko.
Dadaan na ito sa handheld device para naman awtomatikong maipasok sa online system ng ahensya.
Eto ngayon, ang lahat ng ipapasok sa mga handheld device eh hindi na mababago pa.
Cashless payment na rin ang ipapatupad. Ang mga multa ay maaaring bayaran sa pamamagitan ng credit card o load wallets.
Ang mga law enforcement handheld mobile device ay mayroong camera at fingerprint scanner para magamit ng mga LTO traffic enforcer sa pagberipika kung peke o totoo ang ipiniprisintang driver’s license.
Mukhang maganda ang programang ito, pero dapat pa ring hasain ang mga traffic enforcers sa paggamit sa iisyu sa kanilang handheld mobile device. Antabayanan natin kung magiging “smooth” ang pagpapatupad nito.
- Latest