Ayan na nga, mabuti at nasilip ang ilan pang ‘kalokohan’ sa mga requirements bago ka makakuha ng lisensya.
Binalaan ng Land Transportation Office (LTO) ang mga accredited doctors at medical clinics na papatawan ng parusa sakaling mapatunayang may anomalya sa kanilang mga operasyon.
Ginawa ni LTO chief Jose Arturo “Jay Art” Tugade ang babala nang makatanggap ng report na may ilang medical clinic at doktor ang nagbibigay ng medical certificates sa mga aplikante na kukuha ng drivers license kahit walang aktual na physical examination.
Naiisyuhan ang mga ito ng medical certificate kahit nga ‘no show’ ang aplikante.
Short cut, kumubra lang ng bayad, baka nga mas malaki pa ang singil ng mga ito kasi nga hindi na kailangang magpakita o maeksamin ang isang aplikante.
Matindi ang kautusan ni Tugade na walisin ang korapsyon hindi lang sa kanilang hanay kundi maging sa mga accredited partners ng tanggapan, kabilang na dyan ang mga medical clinics na ang serbisyo ng mga ito ay bahagi sa proseso sa pagkuha ng lisensya sa pagmamaneho.
Naku po, paano na nga kung hindi naman natignan ang isang aplikante na magmamaneho at binigyan na lang ng sertipikos, delikado ang ganito.
Mahalaga ang medical certificate sa mga kukuha ng lisensiya upang matiyak na maaari nga itong magmaneho ng sasakyan.
Nag-ugat ito nang mabuko ang gawain ng isang medical clinic sa Bacolod City kung saan kuwestiyunable at talaga namang kaduda-duda ang pagpapalabas nito ng may 186 na medical certificates sa loob lamang ng isang araw.
Walang pila ang mga tao, pero mabilis na na-ibibigay ang medical certificate na pirmado na ng doktor. Ayon nga sa isang nagsumbong hindi naman sila sumailalim sa physical examination pero nabigyan siya ng certificate.
Talagang dapat itong masilip, at mabantayan hindi malayong may ilan pa na ganyan ding ang gawain na mistulang naglolokohan at maaring pagmulan ng maraming disrasya sa lansangan.