EDITORYAL - Bitay sa drug traffickers

DAGSA ang illegal drugs ngayon, particular ang shabu. Masyado nang mabangis ang drug traffickers, wala na silang kinasisindakan. Hindi sila natatakot sa Philippine Drug Enforcement Agency (PDEA). Masyadong malakas ang kanilang loob sapagkat alam nilang malulusutan ang batas sa bansa. O kung maparusahan man, kulong lang at maaari pang magnegosyo ng droga sa loob.

Sa nangyayaring ito na talamak na ang drug trafficking, panahon na para bigatan ang parusa sa mga utak ng drug syndicate at mga miyembro nito. Ibalik ang death  penalty sa mga salot na drug traffickers. Dapat may ma-lethal injection upang masawata ang pagkalat ng illegal drugs.

Halos araw-araw may nakukumpiskang shabu. Noong nakaraang Biyernes, maraming shabu na naka-packed sa Chinese tea bags ang nasamsam ng Philippine Drug Enforcement Agency (PDEA) sa Pozzorubio, Pangasinan. Ang shabu na binubuo ng 360 kilos ay nagkakahalaga ng P2.4 bilyon. Naaresto ang Chinese na si Ke Wujia, 49, lider ng sindikato at residente ng Agoo, La Union, at mga kasama nitong sina Johnbert Yagong, 22; Jenson Rey Yago, 29 at Richell Repuesto, 29.

Ayon kay PDEA director general Wilkins Villanueva, tatlong buwan nilang sinubaybayan ang grupo ni Wujia. Nakatulong ng PDEA ang Armed Forces of the Philippines, Philippine National Police at Bureau of Customs.

Nang araw ding iyon, nakakumpiska naman ang mga pulis ng 40 kilos ng shabu sa Brgy. Poro, San Fernando, La Union na nagkakahalaga ng P272 milyon. Naaresto ang dalawang suspects na sinasabing miyembro rin ng sindikatong pinamumunuan ni Wujia. Bukod sa Pangasinan at La Union, nag-o-operate rin ang Wujia drug syndicates sa Ilocos Norte, Zambales, Bataan at Cebu.

Noong Sabado, nakasamsam naman ang mga pulis ng 1.5 kilos ng shabu sa Cebu City na may street value na P10.2 milyon. Isang suspect ang naaresto na umano’y konektado rin sa Wujia drug syndicate.

Maraming nadadakmang miyembro ng drug syndicates ang PDEA at iba pang drug enforcement agency at maaring swak na sa bilangguan ang mga naaresto. Ang nakapagtataka lamang sa dami ng nahuhuli ng PDEA, wala pa silang ‘‘napakakanta’’ kung saan nanggagaling ang sandamakmak na shabu. Mahalagang malaman ng PDEA ang source ng shabu para ito ang ganap na mawasak at nang wala nang ikakalat na droga sa bansa. Isakatuparan sana ito ng PDEA sa tulong ng iba pang ahensiya. Isulong naman ang parusang kamatayan sa drug traffickers.