MALAKI na ang nabawas sa mga urung-sulong sa pagpapaturok laban sa COVID-19. Sa survey ng Social Weather Stations (SWS), walong porsiyento na lamang mula sa dating 18 porsiyento ang ayaw magpabakuna. Ginawa ang survey noong Disyembre 2021.
Pababa nang pababa ang bilang ng mga ayaw magpabakuna. Mula sa dating 33 percent na ginawa noong Mayo 2021, bumaba ito sa 21 percent noong Hunyo 2021, at bumagsak sa 18 percent noong Setyembre 2021.
Iba’t iba ang dahilan kaya may urung-sulong sa pagbabakuna. May nagsasabing natatakot sila dahil mayroon silang taglay na sakit at baka lalo itong lumubha kung mabakunahan. Mayroong bawal daw sa kanilang relihiyon ang bakuna at may mga nagsabing nahihirapan silang magparehistro on-line o magpa-schedule at may nagsabi rin na hindi nila alam kung saan ang vaccination sites at wala ring nagsasabi sa kanila ukol dito.
Habang araw-araw ay mataas ang naitatalang COVID cases, nagbibigay pag-asa naman na marami na ang nagpapabakuna at pakonti na nang pakonti ang mga urung-sulong. Maaaring sa susunod na buwan ay mas maliit na porsiyento na lamang ang tumatangging magpabakuna.
Isa sa maaring dahilan kaya marami na ang nagpapabakuna ay dahil pinaluluwag at pinadadali na ng local government units (LGUs) ang sistema sa vaccination. Dahil mas maluwag at accessible na sa mga tao, nahihikayat ang marami na magpabakuna.
Gaya sa Quezon City na maluwag at napakabilis ng sistema kaya dagsa ang mga tao. Maraming vaccination centers na mapupuntahan ang mga residente at puwede ang walk-in. Hindi na kailangang mag-online para mabakunahan. Kahit first dose, second dose o magpapa-booster shots wala nang kahirap-hirap sa mga residente. Wala nang marami pang kuskos balungos. Ganito dapat ang ginagawa. Kailangang padaliin at paluwagin ang pagbabakuna para maraming mahikayat.